其實，徐神父開始有系統研究相學，跟學習望診也有莫大關係。他除了在香港修讀中醫課程，亦到北京拜訪名醫學習望診。
「望診即係睇面診病，我研究咗十五、六年。我跟個師父學望診，唔使把脈，就可以開藥方。佢既療效，各方面既對證就相當多，可信性至少有七成，七成對於心理學既測驗來講係好高。」
以中醫來說，疾病的內因就是情緒，所以心理學和中醫也有關係，有了兩者的背境，徐神父自言對研究相學更易了解。
「我從細就鍾意做醫生，十六歲時睇到一套電影，個醫生又係傳教士，黎中國傳教。我都未領洗，就已經想做埋醫生、神父啦。」
在醫治別人的身體和心靈上，他選舉了後者。但是，當醫生的心願，在當神父後亦已實現，他更在香港註冊了一間公司，免費為朋友作中醫診治和心理輔導之用。說到底，徐志忠神父的興趣就是研究人，就是幫助人達致身心的富足。不過，世人一生最渴求的富裕生活，他早已得到。
「我喺上海出世，屋企有基督教既家庭教師，所以就跟咗佢哋信基督教信仰．．．家境唔錯，有游水池、花園、洋房，假山呀、金魚缸都好多個。」
徐神父以手比擬金魚缸，懷緬兒時點滴。憑著相學講座所學，記者偷看他的耳兒，長相肉厚，果然是出自大富之家。
徐神父十歲來港，入讀天主教學校九龍華仁書院。在中三時，他開始對天主教產生興趣。中七畢業後，他便決定進入修會當神父。雖然父親大力反對，揚言要脫離父子關係，但卻無礙他對天主教的百分百投入。
不過，縱然熱愛天主教，徐神父亦認同天主教徒給別人一種保守封閉的感覺。他嘆謂：「實在係可惜，一般係俾自己信念既架構局限咗，真正既救恩係令到我地更自由，而唔係嚟局限我地。」
佛教的包容
所以徐神父坦言，西方基督教信仰在歷史發展的過程中，不及佛教那般寬容。
「所以我間公司圓融軒既圓融，係佛家字眼，圓融即係包容，喺天主教入面，就好難搵到咁靚既名字。我既祈禱方式係用佛教果種靜坐方式，Vipassana（內觀禪，古印度的修行方法，被佛陀用作佛法訓練核心內容。），對信仰既信念好有幫助。」
他又指出，現時的天主教再不強調別人一定要脫離本身的宗教，歸化為天主教徒，重點只在於使他成為一個生命豐盛的人。如果是佛教徒，便幫他做一個更好的佛教徒。在徐神父口中，其實天主教也可以很包容。
「無論係掛住聖母既牌或者觀音既鍊，都冇所謂。呢家好多人戴住佛珠咁様，天主教亦都有大把人戴，佢戴咗個心平安啲，冇所謂。我地追求就係個心平安舒服。唔使咁執著，對人有幫助，就都無所謂。天主唔會責怪，係人先至咁狹窄之嘛。」
待續
沒有留言:
張貼留言