ｂｏｘ１：觀音是中華聖母
徐志忠神父的食、住、工作都在天主教學校裏，但在他的睡房、辦公室和神父共膳的飯廳，都可以找到觀世音的足跡。
「我個寫字樓有個好大既觀音既相，係白衣觀音。一方面有朋友既太太死咗，佢唔想嘥咗，我就擺咗個喺度。」
睡房放著的觀音玉石像，則是幾年前在深圳買的。徐神父望著觀音像，眼底溢出綿綿情意。
「觀音所表達的意義就好美麗，對我有特別意思，我買嚟係紀念媽媽既。因為我喺母胎入面，我媽媽拍緊觀世音電影，佢係電影明星，所以我喺母胎中己經有一個好濃厚既宗教氣氛。觀音就對我親切啲，有緣啲。」
在飯廳內，牆上掛了一幅很大的觀音圖，近看畫上寫著「中華聖母為我等祈禱」。原來那是一個中國化造型的聖母，細看懷抱中還有一個貼上去的金髮嬰孩。
「有個神父加咗個小耶穌，我地就當係聖母，歷史上有人話，中國觀音係受咗西方聖母的形象的影響，結果本來係男性既觀音，變成女性。」
ｂｏｘ２：我幫你返去前世
「啲人返去前世，究竟係咪真係前世，呢個係次要，如果經過佢返過果度，佢而家轉變咗，咁就有價值啦。呢啲真定假既，我地唔去追究，總之幫倒你你就用啦。理論方面，冇得對證。」
身心語法程式學（NLP）的發展受到精神科醫生，擅長催眠治療的Milton Erickson的影響。而催眠治療的一個範疇是前世回溯療法，天主教一向都否認人有前世後世，對於此，徐神父認為：「如果你係搵我去幫，我唔同你去坳撬，你相信前世，我就幫你返去前世既方式來幫你，並唔係表示我自己信果啲。你信有靈界，有附魔既，我就跟住你呢個方式去咗你既世界來幫你。咁我覺得咁樣做，仲附合基督既精神。天主降生成人，入到人既世界來幫人。你人際關係要好，都係要咁様，要願意入到對方的觀點同角度。好既催眠就係要咁樣，可以帶領對方，入到佢自己既世界。用得好既話，我唔反對啲人去用；用得唔好，我就反對，宗教用得唔好，我就反對宗教。而家拉登利用咗宗教製造戰爭，呢啲就係唔好。」
ｂｏｘ３：師父話
「Father係第一個將玄學放喺宗教度，係比宗教既人喺另一個角度去睇呢個學問，佢用好理性，好客觀既態度，去處理一個可能被人誤會為迷信既學問。」
徐志忠神父的掌相學師父李英才，對於神父學相學不感奇怪，但對於徐神父的博學和廣闊胸襟，倒很驚嘆。
「佢廿幾年前，喺學校時比老一輩既神父排斥得佢好犀利，果時佢已經好高位置。以前佢將中醫帶落去宗教度，人地唔會做既嘢，佢會做，呢樣先緊要。」
李英才解釋，相學是一門古老的心理學和粗略的統計學，重點不在乎於對錯，卻在於教化。
「教化係我睇到你既相，你既婚姻唔好，我要教你點樣減輕個程度。術數唔係神，冇人會預知到將來，人既變數太大，但係你又唔可以否認人既將來同現在係掛勾。人係需要了解現在，創造將來。術數係一套研究人既學問，我好相信有人真係會好真心去研究，去幫人。Father就係有心人。」
寫於2002年，刊於快周刊
後記：
訪問神父，似乎不大討好。同事話有冇搞錯，上司的上司聽見頭拎拎，只想放進宗教版。神父彷彿是收看毒藥。但且慢，這個神父不太悶。
訪問由年初時開始約，不願出鏡的徐神父本來拒絕，最後也答應了。本來只知道他研究相學和心理學，沒料到跟他一談，精彩之處源源不絕，像個七彩寶庫，興奮了多天。神父的話，就如那天他給記者弄的熱茶，暖意甘味直入心坎，聽後令人舒暢無比。
發現神父不愛拘束，除了拍照外，神父標誌的衣領脫下，恤衫頸喉鈕敞開。正如他的思想性格，開放包容，反食古不化。正如他的說話，不被受制於框框，要打破局限。
人的確被自加的框框所限制，思想和心腔越鎖越窄，活得很不自在。
2012年後記:
同事和上司對於訪問神父，表現出反感，只是因為他們根本沒看過文章，沒去了解這個神父是怎樣的一個人，只是單憑自己印象中的神父是又悶又嚴肅的人,便認為沒有新聞價值。可是後來在另一更暢銷的時事雜誌中，亦見到徐神父的訪問。有很多人未去了解，先去反對，其實也跟徐志忠神父所說的迷信的人一樣，偏執於己見和過往的經驗,活在自己的框框內。
沒有留言:
張貼留言